Канаш муниципаллӑ округӗнчи Ҫӗнӗ Ахпӳрт ялӗнче урнӑ чир тупса палӑртнипе карантин пулнине ҫирӗплетнӗ.
Патшалӑх ветеринари служби пӗлтернӗ тӑрӑх, ҫак ялта ӗне урнӑ чирпе аптӑрани палӑрнӑ. Кайран выльӑх вилнӗ. Малтанлӑха пӗлтернӗ тӑрӑх, ӗне урнӑ чире тилӗрен ертнӗ.
Халӗ ҫак территорире чӗрчунсене вакцинаци тӑваҫҫӗ. Карантин вӑхӑчӗ тухиччен ҫак тӑрӑха килме юрамасть.
Ӗнер, юпа уйӑхӗн 18-мӗшӗнче, Канаш муниципаллӑ округӗнче виҫӗ ФАП уҫӑлнӑ.
Ҫӗнӗ фельдшерпа акушер пункчӗсем Ҫӗнӗ Шелттӗм, Сител тата Кӗҫӗн Тукай ялӗсенче ӗҫлесе кайнӑ.
Хӗрлӗ хӑйӑва касма пысӑк шайри тӳре-шара пырса ҫитнӗ, ял ҫыннисем пуҫтарӑннӑ.
Кашни ФАПа тума 7 миллион тенкӗ ытла тухса кайнӑ. Ҫӗнӗ пунктсенче прививка тата процедура тумалли пӳлӗмсем, гинеколог пӳлӗмӗсем пур.
Шӑматкун, юпа уйӑхӗн 14-мӗшӗнче, Муркаш муниципаллӑ округӗнчи Кашмашри культура ҫуртӗнче «Хӗрарӑм, сан умӑнта таятӑп пуҫӑма» республика конкурсӗн финалӗ иртнӗ.
Ун пек конкурс кӑҫалхипе пиллӗкмӗш хут иртет.
Финала 8 муниципаллӑ округри хӗрарӑмсем тухнӑ. Вӗсем — Ҫӗрпӳ, Канаш, Шупашкар, Муркаш, Хӗрлӗ Чутай, Сӗнтӗрвӑрри, Ҫӗмӗрле, Йӗпреҫ тӑрӑхӗсенчен.
Конкурса хутшӑннисем хӑйсен пултарулӑхне тӗрлӗ енӗпе кӑтартнӑ. Муркаш тӑрӑхӗнчи Галина Голубева (вӑл Москакассинчи культура ҫурчӗн заведующийӗ) чӑваш апатне хатӗрлемелли конкурсра хуран кукли тата ҫӳхӳ пӗҫернӗ.
Конкурса хутшӑннӑ кашни хӗрарӑмах тӗрлӗ номинацире чысланӑ.
Ӗнер республикӑра ҫил вӑйлӑ пулнӑ. Ҫавна май хӑш-пӗр тӑрӑхра ҫутӑ та сӳнсе ларнӑ.
Инкеклӗ лару-тӑру патшалӑх комитечӗ пӗлтернӗ тӑрӑх, ӗнер каҫхине 19 ялта электричество сӳннӗ, 2,5 пин ытла ҫын шар курнӑ. Ҫак списока Улатӑр, Патӑрьел, Вӑрнар, Йӗпреҫ, Канаш, Муркаш, Вӑрмар муниципаллӑ округсенчи ялсем лекнӗ. Каҫхи 9 сехет тӗлне 11 бригада, пӗтӗмпе 29 ҫын, ӗҫленӗ. 22 сехет тӗлне 14 ялта ҫутӑ пулман.
Аса илтерер: ӗнер ҫил ҫеккунтра 20-25 метр хӑвӑртлӑхпа вӗрнӗ.
Шупашкарта пурӑнакан Анна Иванова паян, юпа уйӑхӗн 10-мӗшӗнче, 100 ҫул тултарать.
Вӑл Канаш районӗнчи Вӑрман Енӗш ялӗнче ҫуралнӑ. Ҫичӗ класс вӗренсе пӗтерсен фермӑна ӗҫе вырнаҫнӑ. Анчах вӑрҫӑ пуҫлансан ӑна связистсен курсне вӗренме янӑ, кайран салтака илсе кайнӑ.
Вӑрҫӑран аманса таврӑнса ҫыхӑну уйрӑмӗн пуҫлӑхӗнче мӗн тивӗҫлӗ канӑва кайичченех ӗҫленӗ. Мӑшӑрӗпе вӑл 1950 ҫулта ҫемье ҫавӑрнӑ. Виҫӗ ывӑлпа икӗ хӗр ура ҫине тӑратнӑ. Паян вӗсенчен пӗр хӗрӗпе пӗр ывӑлӗ ҫук ӗнтӗ — леш тӗнчене уйрӑлса кайнӑ.
Кинемей Шупашкарти хваттерӗнче пӗчченех пурӑнать. Лавккана та тухса кӗрет, килне те хӑех тирпейлесе тӑрать. Питӗр хулинчи хӗрӗ хӑйӗн патне илсе каясшӑн та, кинемей тӑван тӑрӑхран тухса кайма килӗшмест. Кинемей калпак тата шарф ҫыхса вӑхӑта ирттерет, кӳршӗ-аршӑпа хутӑшать.
«Ҫынпа ҫураҫуллӑ пурӑнмалла», — тет тӑнлавне пас тытнӑ Анна Титовна.
Шӑматкун ҫӗрле Шупашкар районӗнчи Тӑрӑн ялӗнче ҫӑва ҫинчи хурал пӳрчӗ ҫунма пуҫланӑ. Инкеклӗ лару-тӑру министерстви пӗлтернӗ тӑрӑх, ҫулӑм пӳрт тӑррине тата хушма ҫурта сиен кӳнӗ.
Кӗҫӗр вара ҫак ялтах пӳрт ҫуннӑ. Вырӑнти ҫынсем каланӑ тӑрӑх, пушар пралука пула тухма пултарнӑ. Ҫурта радиаторпа хутса ӑшӑтнӑ-мӗн. Ҫавна пула тухма пултарнӑ та ҫулӑм.
Ҫавӑн пекех канмалли кунсенче Шупашкарта, Канаш тата Шупашкар районӗсенче типӗ курӑк ҫуннӑ тӗслӗхсем пулнӑ.
Чӑваш Енре «Халӑх дружинникӗ» конкурс иртнӗ. Унта муниципалитет тата хула шайӗнче ҫӗнтернӗ 20 ҫын хутшӑннӑ. Конкурса Юстици ӗҫӗсен патшалӑх служби ШӖМпе пӗрле ирттернӗ.
Пӗрремӗш вырӑна Елчӗк районӗнчи Алексей Тихонов йышӑннӑ. Иккӗмӗш вырӑна Канаш районӗнчи Вячеслав Шпаков тухнӑ. Виҫҫӗмӗш вырӑна вара Элӗк районӗнчи халӑх дружинникӗ Эльвира Иванова йышӑннӑ.
Малти вырӑнсене тухнисене дипломпа тата парнесемпе хавхалантарнӑ.
Чӑваш Енре 19 почта уйрӑмне юсаса ҫӗнетме палӑртнӑ. Вӗсен проекчӗсем экспертиза витӗр тухнӑ.
Ҫав йышра Патӑрьелти, Канаш районӗнчи Вӑтакас Татмӑш, Пайкилт ялӗнчи почта уйрӑмӗсем пур.
Мӗн юсӗҫ-ха вӗсенче? Алӑкӗсене, чӳрече блокӗсене, урайне, батарейсене, электро-, шыв тытӑмӗсене улӑштарӗҫ. Сусӑрсене кӗрсе тухма та май туса парӗҫ.
Тунтикун, авӑн уйӑхӗн 25-мӗшӗнче, Канаш районӗнчи вӑрманта пушар тухнӑ. Ҫулӑм 500 тӑваткал метр лаптӑк ҫинче алхаснӑ. Пушара сӳнтерме 15 ҫын тата 2 техника хутшӑннӑ.
Ҫав кунах кӑнтӑрла Вӑрмар районӗнчи Урнар ялӗ ҫывӑхӗнче типӗ курӑк ҫунма пуҫланӑ. Ҫулӑм 1 гектар ҫинчи курӑка ҫунтарса янӑ.
Аса илтерер: канмалли кунсенче Йӗпреҫ районӗнчи вӑрманта икӗ ҫӗрте пушар пулнӑ.
Канаш районӗнче пурӑнакан 58 ҫулти арҫын «Газпрома» укҫа хывса пуйма ӗмӗтленнӗ. Анчах тупӑш мар, тӑкак курнӑ вӑл.
Ун патне мессенджерта ҫыру килнӗ: «Газпрома» укҫа хывса тупӑш тума пулать иккен. «Брокер Артур» ӑнлантарнӑ тӑрӑх, малтан пӗчӗк укҫа кӑна хывмалла имӗш. Анчах кайран Чӑваш Ен арҫыннине банка кайса кредит илме, «Газпрома» 9 миллион ытла тенкӗ хывма ӳкӗте кӗртнӗ. Анчах вӑл ҫак укҫана каялла кӑларайман.
Ку тӗслӗх тӗлӗшпе пуҫиле ӗҫ пуҫарнӑ.
+3.3 °C